BAGUIO CITY – Maal-allukoy ti panangsuporta latta ti publiko ken panagdonar dagitoy iti proyekto a “Pipty (PHP50) Mo, PPE Ko!” para iti panakagatang ti personal protective equipment (PPEs) a maited kadagiti frontliners iti kampanya kontra iti COVID-19 iti Baguio City, Benguet ken Mountain Province.
Sigun kenni Khristine Molitas, co-coordinator ti proyekto, naiyusuat ti “Pipty (PHP50) Mo, PPE Ko!” idi March 26 no sadino ket maipabpablaak iti social media site a Facebook ti live a panagkanta ti local blues singer a ni Caesar Salcedo.
Maal-allukoy met dagiti viewers ti live video streaming nga agdonar iti P50 tapno adda ti maurnong a maigatang ti PPEs dagiti frontliners.
Kinuna ni Molitas a pinuntirya ti proyekto a makaurnong ti P150,000 ngem babaen iti dakkel a suporta ti publiko ket naartapanen ti puntiryada a gatad.
Dinakamatna nga idi kalman ket dimmanonen iti P252,500 ti nakolektar manipud iti nasao a proyekto a naigatang kadagiti nagduduma a PPEs.
Aw-awaten ti grupo ti donasyon dagiti viewers babaen iti GCash number a 0927- 911- 7581 ken iti bank account ti kadwana a co-coordinator a ni Mia Magdalena Longid a 416-3-416-49302-3.
Nakaipaayen ti grupo iti rinibribo a pidaso ti nagduduma a klasen ti face masks, 58 a karton ti gloves, 14 gallons ti isopropyl alcohol ken 50 face shields.
Naipaay dagiti nasao a PPEs iti nagduduma nga ospital ditoy siudad ti Baguio ken iti probinsia ti Benguet ken Mountain Province ken kadagiti checkpoint personnel ti pulisya iti Baguio-Benguet.
Puntiria metlaeng ti grupo ti gumatang ti kanayonan a PPEs a maipaay met kadagiti dumanon 500 a pulis nga agserserbi a frontliners kadagiti 17 a checkpoints iti nagduduma a paset ti Mountain Province.
Innayon pay ni Molitas nga uray nakaurnongdan iti dakkel a gatad ket ituloyda ti inisyatibo a “Pipty (PHP50) Mo, PPE Ko!” agingga a malpas ti Enhanced Community Quarantine tapno ad-adu pay dagiti frontliners a matulungan dagitoy.
