BAGUIO CITY – Pinarut ken inuram ti operating team ti 1st Kalinga Provincial Mobile Force Company dagiti nadiskobreda a mulmula a marijuana iti kabambantayan a paset ti Ileb, Nambaran, Tabuk City, Kalinga idi kalman.
Sigun kenni PCol. Davy Vicente Limmong, dadaulo ti Kalinga Police Provincial Office, nadiskobre dagiti nasao a marijuana iti dua nga ag-asideg a pagmulaan kabayatan ti panagpatrolya dagiti pulis kadagiti bantay sadiay gaputa siguden nga adda ti nadiskobre a pagmulaan ti marijuana iti nasao a lugar.
Kinunana a ti umuna a pagmulaan ket addaan ti kalawa a mapattapatta a 200 metro kwadrado a nakaparutan ti agarup 1,000 a pidaso ti fully-grown marijuana plants.
Nadiskobre met iti maikadua a pagmulaan nga addaan ti kalawa a mapattapatta a 300 metro kwadrado ti agarup 1,500 a pidaso ti fully-grown marijuana plants.
Kinunana a dumanon iti kagudwa a milyon a pisos (P500,000) ti gatad dagiti nadadael a marijuana nupay awan ti nadanunan wenno nakemmeg a cultivator.
Innayonna nga idi paylaeng ket kanayondan a bagbagaan dagiti umili ti Kalinga iti panagsardeng dagitoy iti panagmula ken panagilako ti marijuana ken iti panangpabalinda iti dagada a pagmulaan ti fruit-bearing trees, nateng ken root crops a mangital-o ken mangsustinir iti nasalun-at a panagbiag.-gcb
