BAGUIO CITY – Iyap-apela ti maysa a transport group ditoy siudad ti Baguio ken iti probinsia ti Benguet ti panangipaay dagiti gasolinaan iti P6 a diskwento kadagiti produkto dagitoy a petrolyo, partikular ti krudo kadagiti parapubliko a lugan.
Iti panakiyuman ti Bombo Radyo kenni Lito Wayas, presidente ti Pinagkaisang Samahan ng mga Tsuper at Operator Nationwide – Baguio-Benguet Chapter, kinunana a supsuportaranda ti kiddaw ti national office dagitoy a panangipaay dagiti gasolinaan kadakuada iti P6 a diskwento manipud iti agdama a P1.50.
Kinunana a nabayagen a tubtubngarenda ti nangato unay wenno overcharge a presyo dagiti petrolyo ditoy siudad.
Impettengna pay a saan a malugi wenno dakkel latta ti maganansiya dagiti gasolinaan uray no patganda ti kiddaw ti transport group a P6 a diskwento.
Impalawagna a no saan nga ipaay dagiti gasolinaan ti kiddawda ket posible a dagiti pasahero ti mangibaklay iti panangngina dagiti produkto a petrolyo gapu iti baro a tax reform program ti gobyerno.
Inyapelana pay ti panangtulong ti gobyerno iti transport sector iti lokalidad iti panakaguyugoy dagiti gasolinaan para iti panakanayon ti diskwento nga ipaay dagitoy kadagiti parapubliko a lugan.
