BAGUIO CITY – Nakemmeg manen iti maikadua a gundaway ti maysa a drug personality kalpasan ti buy-bust operation nga insayangkat dagiti kameng ti PDEA-Benguet sadiay Km. 3, Balili, La Trinidad, Benguet idi malem kalman.
Nabigbig daytoy a ni Romeo Espino alyas “Buyang”, 53-anyos ken residente ti Camp Allen, Baguio City.
Nakumpiskar kenkuana ti agarup 10 a gramo ti mapapati a shabu nga aggatad ti P68,000, nagduduma a drug paraphernalia ken ti cellphone nga inaramatna iti transaksyon.
Maibasar iti rekord ti PDEA, nakemmeg ni Espino iti naipatungpal a search warrant iti pagtaenganna idi napalabas a bulan ngem nakaruar iti pagbaludan kalpasan a nakapiansa.
Gapu iti panakakemmeg manen ni Espino ket sumango manen daytoy iti kaso a panaglabsing iti Comprehensive Dangerous Drugs Act of 2002.
Naamuan a saanen a makapagpiyansa ti nasao nga indibidual gapu iti kaado ti iligal a droga a nakumpiskar kenkuana.
Kagiddan iti daytoy, kidkiddawen ti PDEA-Cordillera ti dagus a panangireport ti publiko kadakuada no adda dagiti makitkita dagitoy nga aktibidad mainaig iti iligal a droga.
