BAGUIO CITY – Ag-epektibo inton Pebrero 25, Martes ti P9 a minimum fare iti parapubliko a jeep ditoy Cordillera Region.
Iti interview ti Bombo Radyo Baguio kenni Patricio Evangelista, presidente ti Federation of Jeepney Operators and Drivers Association iti Baguio-Benguet, kinunana nga impaulogen ni Land Transportation Franchising and Regulatory Board (LTFRB) – Cordillera Regional Director Lalaine Sobremonte ti pammilin para iti panakaipangato ti minimum a plete iti rehiyon.
Innayonna a pormal to nga iwaragawag ni Dir. Sobremonte ti nasao a panagngato iti plete inton Lunes.
Dinakamatna a saan metten a nasken nga agaplikar dagiti drivers ti fare metrics.
Sigun pay kenkuana, mabalin latta nga ag-avail dagiti estudyante, PWDs ken senior citizens iti diskwento manipud kadagiti drivers.
