BAGUIO CITY- Agarup P9-B ti gatad dagiti illegal drugs a nakumpiskar ti Philippine Drug Enforcement Agency (PDEA)-Cordillera manipud 2016 agingga iti agdama a tawen.
Buklen daytoy ti marijuana, shabu, derivatives, ecstasy, cocaine, opium poppy seeds ken dagiti regulated drugs a kas iti midazolam, fentanyl ken Controlled Precursors and Essential Chemicals (CPECs).
Iti datus ti PDEA-Cordillera, P6.80-B a gatad ti iligal a droga ti nakumpiskar ken nadadael idi 2016; ₱76-M idi 2017; ₱193.35-M idi 2018; ₱508.54-M idi 2019; ₱575.92-M idi 2020; ₱1.69-B idi 2021 ken ₱629.92-M manipud Enero agingga Abril iti agdama a tawen.
Sigun kenni Gil Castro, dadaulo ti nasao nga ahensiya, sumagmamano kadagiti marijuana ket nadiskobre kabayatan ti operasyon dagiti otoridad kadagiti kabambantayan.
Impettengna a dagus a madadael dagiti marijuana plants iti lugar a nakaimulaaan dagitoy kas maitunos iti pammilin ti korte.
Pagyamyamanan met ni Castro ti panakipagmaymaysa dagiti umili iti pannakapaksiyat ti iligal a droga iti Cordillera babaen iti panangipaayda ti impormasyon seknan iti presensiya dagiti iligal a droga iti masakupanda a lugar.
Impanamnama ni Castro nga itultuloy ken ad-adda pay nga ingetan ti PDEA-Cordillera ti kampanyada kontra iti iligal a droga uray pay agleppasen ti termino ni President Rodrigo Duterte.
