Manamnama ti panakaiwaras ti “Paella a la Cordillera” kas highlight ti panagleppas ti Farmers and Fisherfolks month iti Melvin Jones Granstand idiay Burnham Park, Baguio City inton Mayo a trenta iti agdama a tawen.
Iti panakiuman ti Bombo Radyo kenni Jonathan Llanes, Information Officer ti Department of Agriculture – Cordillera, daytoy ti kaunaan a gundaway a maaramid ti “Paella a la Cordillera” kas highlight ti nasao nga aktibidad.
Maitampok ditoy dagiti naisangsangayan a produkto iti rehiyon Cordillera a heirloom rice, pinuneg, etag ken dagiti high value products wenno dagiti nateng.
Sigun kenni Llanes, manamnama nga agarup 800 angingga sangaribo nga indibidual ti makaraman iti daytoy.
Manamnama a dagiti nalalatak a chefs manipud iti siudad, Metro Manila kasta met kadagiti nagduduma a paset ti pagilian ti mangaramid iti “Paella a la Cordillera.”
Dagiti chefs ket aglikmot iti nagduduma a probinsiya ti rehiyon Cordillera para iti panakaala dagiti ingredients.
Kinuna ni Llanes nga iti “Paella a la Cordillera” ket maipakaammo pay ti heirloom rice ti rehiyon, maysa a kita ti bagas a napnuan iti nutrisyon nu idilig kadagiti commercialized a bagas.
Daytoy ket maapit iti maysa laeng a daras iti makatawen ken kadawyan nga agtataud daytoy iti probinsiya ti Benguet, Ifugao, Mt. Province ken Kalinga.
Kabayatanna, sigun kenni Marlyn Tejero, Chief of the Field Operations Division iti Department of Agriculture – Cordillera, dagiti ingredients a mausar manipud kadagiti Good Agricultural Practices (GAP) dagiti mannalon.
Dagiti ingredients a karaman ditoy ket ti 10 kilos a “Pinunnog” wenno ti Ifugao version ti Ifugao version, “Kiniing” wenno smoked meat, longganisa, native chicken meat ken daduma pay.//Bombo Mera Pacpacan
