Nagserra dagiti pagadalan iti sentro ti Thailand gapu iti nakaro nga asok a mapaspasaran dagiti tattao sadiay.
Gapu iti dayta, “online classes” ti wagas ti panageskuela dagiti studiante agingga nga ilukat dagiti dadaulo dagiti pagadalan.
Sigun iti World Health Organization, ngimmato ti kumarkaro a makasabidong nga asok.
Iti panagsukimat dagiti eksperto, ti kumarkaro a “toxic smog” ket nasurok nga innem a pulo a daras ti inrekomendar ti World Health Organization nga inaldaw a maximum.
Mapapati a napaay a tamingen ti gobierno sadiay ti nasao a parikut gaputa maysa ti “smog” wenno nakaro nga asok ti rason iti ipupusay dagiti tattao ken dakkel a makaapektar daytoy kadakuada nangruna ti salun-at dagiti ubbing ken nataengan.
Iti agdama, agtultuloy latta ti panagmonitor dagiti maseknan nga ahensia sadiay.
Maipakaamo a tunggal tawen ket maab-abbungutan ken mapaspasamak ti makasabidong nga asok gapu iti panangpuor kadagiti rugit dagiti mannalon kadagiti kabangibang a rehion tapno malinisan dagiti talonda para iti panagarado, kasta met kadagiti paktoria ken asuk ti trapiko.
