BAGUIO CITY – Nangipaulog ti City Environment and Parks Management Office ti pagannurotan kadagiti mangayat a mangipatungpal ti massage operations sadiay Burnham Park, Baguio City.
Kasaruno daytoy ti agtultuloy nga iligal a panag-operate dagiti indibidwal wenno grupo nupay man iparparit ti city government.
Sigun iti maysa a Security Guard iti nasao a pagpasyaran, nangisayangkat ti nasao nga opisina ti taripnong kadagiti masahista para iti panakabinsa-binsa dagiti nagduduma a pagannurotan a masapolda a tungpalen tapno nawaya ti panangipatungpalda iti nasao nga aktibidad sadiay.
Karaman ditoy ti panangipasada iti profiling ti Department of Social Welfare and Development pakairamanan ditoy ti kinaadda ti lisensya dagiti masahista.
Kalpasan ti profiling, kasapulan a mangbukel dagitoy ti maymaysa laeng a grupo dagiti masahista gapu ta adda ti active a tallo a grupo iti agdama.
Iti panakabukel ti grupo, kasapulan a mangdutokda ti opisyales ken mangaramidda ti By laws nga isubmitirda iti City Environment and Parks Management Office.
Nu sadino kalpasan a marepaso, marevise ken maaprobaran ti nasao a By laws ket maisubli kadagiti masahista kasta met a maipaayan ti kopya ti Public Order and Safety Division (POSD) ken Tourist Police Unit (TPU).
Kabayatta, nu asinoman ti masarakan nga aglabsing kadagiti pagannurotan a nabukel ket maiparit nga agmasahe iti nasao a parke.//Bombo Jez Lapizar
