Inyunay-unay ni Andrew Pinero, Media Relations Officer-Hotel & Restaurant Association of Baguio a saan a rumbeng a maaramat ti Baguio Flower Festival tapno agkampanya dagiti politiko.
Sigun kenni Pinero,nawaya dagiti agngayngayangay ken kandidato iti 2025 National ken Local Elections a makipaset iti Baguio Flower Festival nangruna iti maisayangkat a parada ngem rumbeng nga agtulnogda kadagiti pagalagadan.
Sigun kenni Pinero, mabalin nga agaramid dagitoy iti bukodda nga entry iti float parade.
Nupay kasta, nainget a maiparit ti panangiwaras dagitoy kadagiti campaign paraphernalias kasta met a saanda a mabalin a bumaba iti paglugananda a float tapno makipagsamano kadagiti tattao.
Malaksid iti dayta, saan a mabalin nga agaramat dagiti agngayngayangay ken kandidato kadagiti T-shirts a naimprentaan kadagiti nagnaganda wenno kadagiti anyaman a kagawaan a mangitantandudo iti naganda ken iti pagtartarayanda a posisyon.
Kinuna ni Pinero a maiparit met a makargaan iti poster ti naituding a ruta ti parada nangruna ket naipakammon dagiti common poster area para kadagiti campaign materials.
Innayon ti nasao nga opisyal a naipaayan dagiti politiko a kayatda a dumar-ay iti parada iti kopya maipapan kadagiti pagannurutan.//Bombo Mera Pacpacan
