Naipatungpal ti joint maritime exercise iti nagbaetan ti Philippine Coast Guard ken Vietnam Coast Guard sadiay Manila Bay.
Daytoy ket kas paset ti lima nga aldaw a panagbisita ti Hanoi ship iti pagilian.
Sigun iti Philippine Coast Guard, naisayangkat ti Search and rescue, fire and explosion prevention training, ken passing exercise nu sadino addaan daytoy ti panggep a mangipasayaat iti interoperability ken operational readiness dagiti dua a coast guard kas aktibo a miembro ti Association of Southeast Asian Nations (ASEAN) Coast Guard Forum (ACF).
Itay napalabas a Lunes kalpasan ti welcome ceremony ket nagcourtesy call ni Vietnamese Coast Guard Region 2 Vice Commander Colonel Hoang Quoc Dat kenni Philippine Coast Guard Commandant Admiral Ronnie Gil Gavan tapno pagtalantananda ti maipapan kadagiti panggepda para iti masakbayan.
Maipalagip nga idi Enero iti agdama a tawen ket nagpirma ti Philippine ken Vietnamese Coast Guards iti memorandum of understanding para iti panakabukel ti joint Coast Guard committee ken hotline communication mechanism.
Kabayatanna, impeksa ti Department of Foreign Affairs (DFA) a silulukat daytoy para iti anyaman a koordinasyon iti Vietnam tapno magun-od ti solusyon kadagiti pakaseknan iti South China Sea kas nakabasar iti international law.
