BAGUIO CITY – Mangnamnama ti Traffic Enforcement Unit (TEU) ti Baguio City Police Office (BCPO) nga iti baro a number coding scheme a binukel ti Baguio Traffic Management Working Group para kadagiti taxi drivers ken operators ket maisimpa ti parikut iti trapiko iti siudad ti Baguio.
Iti panakiuman ti Bombo Radyo Baguio kenni P/Major Roldan Cabatan, dadaulo ti nasao nga yunit ti pulisya, ti baro a number coding scheme ket insagana ti nasao a working group ken dagiti taxi drivers ken operators kas sungbat iti kiddaw dagiti taxi drivers a panakabaliw ti sigud a number coding scheme a sursuruten dagitoy.
Inlawlawagna met a ti baro a number coding scheme ket maiyaplikar laeng kadagiti taxi drivers ken operators a ti biahe dagitoy ket iti masakupan ti Baguio City nga agpaut agingga inton October 31 ti agdama a tawen.
Imbinglayna nga iti baro a number coding scheme a binukel dagitoy ket uppat nga numero ti maipasidong iti coding iti innaldaw.
Dinakamatna a babaen iti daytoy ket mabalanse ti kaadu dagiti agbiahe a taxi iti innaldaw, maksayan ti nailet unay a trapiko ken adda ti mapastrekan dagiti drivers ken operators.
Sigun pay kenni Major Cabatan, dagiti aldaw ti Martes, Miyerkoles ken Huwebes ti apektado nga aldaw kadagiti taxi units nga agbiahe paturong sadiay La Trinidad gaputa posible a masitar wenno matiliw dagitoy iti number coding ti nasao nga ili.
