Agtultuloy ti panagmonitor dagiti kameng iti Department of Trade and Industry-Cordillera kadagiti pagtagilakwan nangruna dagiti key establishments iti rehion kagiddan ti umadanin a Paskua.
Iti panakiuman iti Bombo Radyo kenni Juliet Lucas,Director iti Department of Trade and Industry-Cordillera, awan pay iti establishimento a naduktalanda nga aglablabsing iti price guide partikular kadagiti Noche Buena products nga impaiyulog iti nadakamat nga ahensya idi laeng napan a bulan.
Sigun kenni Lucas,maibasar iti insayangkatda a monitoring,agtaltalinaed iti umno a presyo dagiti gagatangen iti rehion rason nga iti agdama ket awan pay ti naawatda a reklamo manipod kadagiti konsyumer seknan iti overpricing.
Nupay kasta, inlawlawag ti opisyal nga iti nairuar a price guide, nagduduma ti nagbaliwan iti presyo dagiti produkto nu sadino, sumagmamano kadagitoy iti ngimmato, daduma ket bimmaba nu idilig kadagiti presyoda idi napan a tawen, ken adda latta dagiti nagtalinaed kadagiti sigud a presypoda.
Impetteng ni Lucas a ti price guide ket epektibo agingga laeng iti ngudo iti agdama a bulan.//Bombo Rob Dominguez
