BAGUIO CITY – Manarimaan ti imbestigasyon dagiti maseknan nga otoridad para iti panakaduktal ti pakabigbigan ti nadiskobre nga agruprupsa a bagi ti tao iti paset ti Baokan river, boundary ti Bakun ken Mankayan idi Mierkules, June 12.
Maibasar iti imbestigasyon ti Bakun Municipal Police Station, ti nasao a bangkay ket mapatta-patta nga agtawen ti 20 agingga 40, addaan katayag a 5.4 feet, above the shoulder ken naingpis ti buokna, awanan ti tattoo, ken awanan ti makin-ngato a ngipen.
Impakaammo daytoy ni Jack Lestino Paekan, concerned citizen a residente ti Papasok, Dalipey, Bakun, Benguet, a tumtumpaw ti bangkay iti nasao a karayan.
Dagus met a nagturong ti Bakun MPS, Bureau of Fire Protection – Bakun, Rural Health Unit – Bakun, ken Municipal Disaster Risk Reduction and Management Office nu sadino nakumpirmarda ti kaadda ti agruprupsa a bangkay iti nadakamat a lugar.
Nangipatungpal pay dagiti maseknan nga otoridad ti ocular inspection iti nakasarakan ti bagi ti lalaki.
Iti agdama, addan ti bangkay sadiay Sitio Teba-ang, Dalipey, Bakun, Benguet para iti panakaipasidong daytoy iti ritwal sakbay a maipaima iti maseknan nga opisina.//Bombo Rob Dominguez
