BAGUIO CITY – Nangrugin idi kalman ti temporaryo a panakaipasidong iti lockdown ken ECQ ti tallo a barangay sadiay Kabugao, Apayao a pakaipatpatungpalan ti tallo nga aldaw nga aggressive community testing (ACT) nga agleppas inton Dominggo, Agotos 29.
Babaen daytoy iti Executive Order No. 7 nga impaulog ni Kabugao Mayor Bensmar Ligwang kas paset ti local intervention iti panakaipatungpal ti nasao nga aktibidad.
Sakupen ti lockdown ti Purok Landing, Santa Pukaw ken Hillside iti Barangay Poblacion; ti Sitio Taracay sadiay Barangay Lenneng ken ti Barangay EKB.
Nailanad iti pammilin a bayat ti implementasyon ti ECQ ket limitado ti panagbiahe dagiti umili ken limitado met ti operasyon dagiti business establishments.
Agpatrolya met dagiti pulis tapno maipasigurado a masursurot dagiti community quarantine protocols.
