Kinumpirmar iti Philippine National Police(PNP) a nalpasen nga insuko ti kampo ni Charlie “Atong” Ang ti lima kadagiti paltog daytoy.
Pakairamanan daytoy ti Colt rifle,Glock pistol, Sigsr pistol, ken Smith .38 revolver bayat a naipakaammo met a napukaw idi October 2025 ti caliber .260 rifle.
Sigun iti Firearms and Explosives Office (FEO), dagiti nasao nga armas ket insuko dagiti legal counsels ti nasao a business tycoon iti Mandaluyong City Police Station idi laeng Martes.
Iti agdama,naipaiman iti safekeeping iti nasao nga istasyon ti pulisya dagiti paltog ni Ang.
Immunan nga inkanselar ti kapulisan ti lisensya dagiti paltog ti nasao a negosyante kas paset ti panagreggetda para iti panakaarestar daytoy.
Maipalagip a ni Ang ket sarsaraken ita dagiti otoridad kalpasan a naipaiyulog ti arrest warrant kontra kenkuana gapu kadagiti kaso a sangsangwenna mainaig kadagiti missing sabungeros.
Naideklara pay daytoyen a “number one most wanted” iti pagilian nu sadino, maidiaydiaya ti ₱10 million a gungguna kadagiti makaipaay ti impormasyon para iti panakaarestarna.
