Namnamaen dagiti pamilia ti mapapati a biktima ti war on drugs ti naglabas nga administrasion a mangipaulog ti arrest warrant kontra kenni sigud a President Rodrigo Duterte inton bulan ti Disiembre.
Sigun kenni Atty. Kristina Conti, counsel para kadagiti pamilia dagiti biktima ti war on drugs a maipaulog ti warrant of arrest ken kinunana a numan maitantan ti warrant ket mabalin latta nga umay iti sumaruno a tawen.
Immunan a kinuna ti Philippine National Police (PNP) a nakasagana dagitoy a mang-assitar iti NTERPOL iti panangipaayda ti arrest warrant nga ipaulog ti International Criminal Court.
Iti kanito a maipaulog ti arrest warrant ket matiliw ni sigud a President Duterte, maiyakar nga umuna iti pagilian a kameng ti International Criminal Court sakbay a maipatulod idiay The Hague para iti “trial” daytoy.
Maipalagip nga immikat ti Pilipinas iti Rome Statute—ti katulagan a nangipasdek iti International Criminal Court—idi 2018, a nagepektibo ti withdrawal ti Pilipinas idi 2019, kalpasan a rinugian ti tribunal wenno korte ti umuna nga imbestigasion iti drug war ti administrasionna.
Kabayatanna, impaganetget ni President Ferdinand Marcos Jr. ti takderna a saanna a bigbigen ti jurisdiction ti International Criminal Court iti Pilipinas.
Sigun met kenni Department of Justice Undersecretary Raul Vasquez, saan a makibiang ti gobierno ti Pilipinas iti aramid ti ICC.
Iti agdama, im-imbestigaran metlaeng ti Department if Justice dagiti mapapati a panangabuso iti kampania ti napalabas nga administrasion kontra iti illegal a droga.
