Dumanon ti 15 a pamilya ti naapektaran ken immakar iti pagnanaedan gapu iti panagdalapos ti naglabas a bagyo sadiay camp Camp 3 Acupan, Virac, Itogon Benguet.
Iti panakiuman ti Bombo Radyo kenni Nestor Martillano Jr. kapitan iti nasao a barangay, kinunana a dagiti immakar a pamilya ket dagiti totally damaged ti pagtaenganda gapu iti bagyo a napasaran itay kallabes partikular ti bagyo nga Emong.
Sigun kenkuana, awan paylaeng ti site wenno lugar a mabalin a panakarelocate-an dagiti nasao a pamilya rason a dadduma kadagitoy ti makipagnanaed kadagiti kakabagyanda bayat a nagturong dagiti dadduma iti sabali pay a pagtaengan dagitoy.
Gapu iti dayta, awanen ti agnanaed sadiay iti agdama.
Malaksid ti dayta, naapektaran metlaeng ti pagadalan a naipasdek sadiay kalpasan a saan metlaengen a natalged ti nasao a lugar rason a nga immakar dagiti estudyante sadiay kadagiti dadduma a pagadalan.
Kinuna ti kapitan a dumanon iti nasurok 100 nga estudyante manipud iti nasao a pagadalan ti nagakar kadagiti dadduma a pagadalan.
Nupay kasta, parikut dagiti estudyante ken dagiti nagannak dagitoy ti panagbyahe-da paturong iti baro a pagadalan dagitoy.
Iti baet dayta, adda metten ti mapadpadaanan a dialogue kadagiti umili ken ti Local Government Unit tapno maamuan no maipawil ti isingsingasing dagitoy a panakaaramat ti pagadalan sadiay Camp 1 Sitio Acupan para kadagiti estudyante tapno saan dagitoy a marigatan.
Impeksa pay ti kapitan nga ar-aramidenda ti amin a kabaelan dagitoy tapno masolbar ti parikut dagitoy.
Iti sabali a bangir, agtultuloy met ti panangipaay dagitoy iti tulong kadagiti pamilya a naapektaran kadagiti naglabas a bagyo nangruna kadagiti landslide prone area saan laeng a manipud ti sitio Acupan no diket uray pay kadagiti daduma a sitio ti nasao barangay.
Dagitoy a tulong ket kas iti panakaiaptungpal ti tupad ken package of livelihood manipud ti nagduduma nga ahensya kas ti Department of Labor and Employment.
Dakkel met a tulong kadakuada ti panakaideklara ti nasao a lugar iti state of calamity gapu ta naaramatda ti quick response fund a dumanon ti 30%.//Bombo Noveh Organo
