BAGUIO CIT -Maur-uray paylaeng ti panangaprobar ti Department of Education (DepEd) – Cordillera iti implementasyon ti limited face-to-face class kadagiti 291 a pagadalan iti Benguet a nangisubmitir ti letter of intent para iti panangipatungpalda iti nasao a wagas ti panagadal.
Sigun kenni Benguet Schools Division Superintendent Gloria Buya-ao, agtaltalinaed a ti laeng Naguey Elementary School ken Japa Elementary School sadiay Atok ti napalubusan a mangisayangkat ti limited face-to-face class nupay temporaryo a naipasardeng gapu iti panakaipasidong manen ti probinsia iti Alert Level 3 itay laeng nabiit.
Kinunana a kaaduan kadagiti pagadalan a nagkiddaw a mapalubusan a mangisayangkat ti limited face-to-face classes ket masarakan kadagiti nasulsulinek a barangay ti Benguet.
Mangnamnamada met a manayonan dagiti mapalubusan a mangisayangkat iti nasao a wagas ti panagadal kalpasan dagiti inspeksion ken no makompleto dagiti pagadalan dagiti kaskenan a dokumento malaksid pay a no ipalubos ti akinsakop a lokal a gobyerno.
Kabayatanna, pagsagsagaan metten dagiti mannursuro sadiay Benguet ti panakabakuna dagiti estudyante kasaruno ti panagrugin ti COVID-19 vaccination dagiti ubbing nga agtawen ti lima agingga sangapulo ket maysa ditoy pagilian.
