Nangiruaren ni Mayor Benjamin Magalong iti Executive Order No. 53, series of 2026, a temporario a masuspindir ti panangipatungpal iti number coding ordinance iti siudad para laeng kadagiti Public Utility Jeepney (PUJ) manipod Abril 27 agingga inton Mayo 27, 2026.
Ti number coding para kadagiti pribado a lugan ken dadduma pay a kita iti transportasion ket ad-adda a maipatungpal kas maibasar iti Ordinance No. 94-2025 a nang-amyendar iti Ordinance No. 001-2003, a pagaamo metlaeng kas Baguio City Number Coding Scheme.
Sigun kenni Mayor Magalong, ti exemption wenno pannakailaksid dagiti PUJ ket maysa a temporario nga addang tapno maipaayan iti nalawlawa nga operasion dagiti operator ken drayber bayat a sangsangwen ken bumangbangon manipod iti epekto iti agtultuloy a krisis iti presio iti gasolina.
Innayonna pay nga agserbi metlaeng daytoy a temporario a wagas tapno maobserbaran ken sukimaten nu makatulong ti exemption iti panangpasayaat iti gunay iti trapiko iti parapubliko a transpotasion wenno mangitunda iti nakarkaro a trapiko iti siudad.
Sakbay daytoy, immuna nga imbilin ni Mayor Magalong ti temporario a panangsuspindir iti number coding scheme para iti amin a kita iti lugan manipod Abril 8 agingga Abril 24, 2026, kas sungbat kadagiti karit iti transportasion a nangitunda iti panagngato iti presio iti gasolina.
Impuntona nga adda dagiti probision iti ordinansa a mangipalubos iti panangsuspindir iti nasao a sisteme kadagiti naidumduma a kasasaad a kas kadagiti kalamidad wenno gulo.
Impeksa pay ti nasao nga opisial a ti panagngato iti presio iti gasolina ket nangitunda tapno adu a parapubliko nga operator ti agkessay wenno agsardeng iti operasion.
Gapu iti daytoy, bimmasit ti bilang dagiti lugan nga agbibiahe ken nangitunda iti pannakariribuk kadagiti komyuter a sumrek iti trabaho, pagadalan, ken dadduma pay a napapateg a pagturonganda.
Impaganetget iti mayor a ti agdama a pannakasuspindir ket temporario nga addang laeng tapno maksayan ti pakasekna iti mobility bayat nga agtultuloy nga ad-adalen iti siudad ti epekto daytoy iti gunay iti trapiko.
