BAGUIO CITY – Naireklamo ditoy istasyon ti Bombo Radyo Baguio ti maysa a panaderya ditoy suidad ti Baguio kalpasan a nasarakan ti maysa nga ipes iti lakoda a pandesal.
Personal a nagturong ditoy istasyon ti maysa a maseknan nga umili tapnu ireklamo ti naduktalanna a kaadda ti maysa nga ipes iti maysa kadagiti ginatangna a pandesal.
Kinuna a ginmatang daytoy iti 20 a pidaso ti pandesal iti malem ti Miyerkules ken kabayatan ti panangkaanna iti daytoy ket nakitana ti maysa nga ipes.
Gapu iti daytoy, saannan nga intuloy ti panangkaanna ti pandesal ken imbalakadna pay iti pamilyana a saandan nga ipauneg dagiti nabati a pandesal.
Kinuna pay ti nagreklamo a kustomer a saannan a kayat a masukatan dagiti pandesal ngem nasken kuma a simpaen ti nasao a panaderya ti panangaramidda kadagiti pandesal.
Sigun met iti management ti panaderya a masarakan sadiay Kayang Street, imbestigaranda ti nasao a reklamo ken aklonenda ti responsibilidad iti napasamak.
Kinunada pay a linawas a mangisaysayangkatda ti pest control kas psset ti Standard Operating Procedure ti bakery tapnu maliklikan dagiti peste infestation iti production area.
Kabayatanna, dinakamat ni Engineer Charles Carame, dadaulo ti Sanitation Division ti City Health Services Office a mabalin a maikkat ti permit dagiti establishimiento nga agiserserbi wenno agilaklako kadagiti taraon nga addaan pangta wenno napeggad iti salun-at dagiti kustomer. (-with Bombo Charles Nikko Limon)
