BAGUIO CITY – Agtultuloy iti panangipaay ti Department of Tourism (DOT) – Cordillera iti akreditasyon kadagiti accomodation establishments ditoy siudad ti Baguio.
Sigun kenni DOT-Cordillera OIC Regional Director Jovy Ganongan, dumanonen iti 500 dagiti establishimento ti naipaayanda ti akreditasyon a kaipapananna a nakasaganan dagitoy nga agawat kadagiti bisita.
Kinunana nga agrikrikosda tapnu sukimaten ken ipaayan iti akreditasyon dagiti tourism establishments a sumursurot kadagiti naituding a minimum public health standards kontra iti COVID-19.
Inlawlawagna pay a babaen iti daytoy ket maipasigurado ti kinasagana dagiti nasao nga establishimento ken ti siudad a mang-awat kadagiti bisita iti kanito a malukayan dagiti travel restrictions ken umado ti bilang dagiti turista a sumangbay iti lokalidad.
