BAGUIO CITY – Pinalagipan manen ti Security and Exchange Commision dagiti negosyante ken umili nga agannad dagitoy kontra kadagiti investment scams.
Iti interview ti Bombo Radyo, kinuna ni Helen Veryan Valdez, Information Officer ti SEC-Cordillera, maysa kadagiti nalatak nga investment scam a nakabiktima ti ado nga indibidual ket ti Wozmara.
Allukoyen dagiti scammer ti maysa nga indibidual wenno grupo nga idownload-da ti nasao nga application ken masapul nga aggatangda ti engine gaputa sigun kadagitoy ket madoble wenno triple pay ti kwarta a pinag puonanda.
Impetteng ni Valdez a nalaka a mabiktima dagiti tattao gaputa online ti panang-allukoy ken panggundaway dagiti scammer.
Gapu iti daytoy, imbalakad ti opisyal a sakbay a maki-transact ket agturong pay iti opisina ti Security and Exchange Commission tapno maberipikar nu lehitimo ti kompanya a mangididiya ti investment.
Babaen iti daytoy ket masalwadan ti nagbannugan a kwarta kontra kadagiti managgundaway nga indibidual.
Sigun pay kenni Valdez, mabalin a bisitaen ti website ti ahensiya, sec.gov.ph ken ti capital market registry system gaputa makita ditoy ti nagan dagiti rehistrado a kompanya.
