Binabalaw iti Department of Justice(DOJ) ni Cezarah “Sarah” Discaya kalpasan a nag-finger heart daytoy ken nagangaw kadagiti kameng iti media.
Inladawan ti departamento a maysa daytoy a panangipakita iti insincerity ken complacency nangruna ket maysa daytoy kadagiti kontrobersyal a kontraktor a maim-imbestigaran iti agdama.
Maipalagip nga idi napan a lawas, nagturong ni Discaya iti DOJ para iti case build-up dagiti karaman iti naanomalyaan a flood control projects nu sadino, iti panaglabasna ket naalaan dagiti kameng iti media ti video ti panag-finger heart daytoy ken panangisawangna iti “Gandahan niyo ’yung memes ko.”
Sigun kenni DOJ Spokesperson Mico Clavano, maikonsidera ti panag-finger heart ni Discaya iti panang-assess ken evaluate dagitoy kadagiti karaman nga indibidwal.
Kagiddan dayta, kiniddawna kadagiti amin a persons of interest iti nasao a kaso a mangipakita iti umno a kagagalad, makitinnulong a nasayaat ken iti propesyunal a wagas.
