BAGUIO CITY – Pagsagsaganaan ita ti DepEd-Cordillera ti umadani a panaglukat ti klase babaen iti panang-adalda kadagiti nagduduma a modality wenno wagas ti panagadal a maaramat iti school year 2021-2022.
Iti panakiuman ti Bombo Radyo Baguio, kinuna ni DepEd-Cordillera Regional Director Estela Cariño a kaadoan pagadalan iti Benguet, Baguio City ken Mountain Province ti mangkayat a mabaliwan ti printed modules a wagas ti panagadal.
Kinunana a kidkiddawen dagiti pagadalan kadagiti nasao a lugar a maisayangkat ti blended learning tapno saan laeng nga agpatingga iti printed modules.
Nupay kasta, imbinglayna met a kidkiddawen dagiti kaaduan a pagadalan sadiay Apayao, Abra ken Ifugao ti panagtalinaed ti printed modules a wagas ti panagadal gaputa adda dagiti lugar nga awanan ti suplay ti kuryente ken access iti internet connection.
Gapu iti daytoy, inlawlawag ni Cariño a nakadependar kadagiti pagadalan no anya ti maiyaplikar a wagas ti panagadal la ketdi epektibo ken makatulong daytoy kadagiti estudyante.
Dinakamatna a malaksid iti printed modules ket mabalin a maiyaplikar iti sistema ti panagisuro ti two-way radio, television-based instruction, radio-based instruction ken ti online classes.
Kabayatanna, imbinglay pay ni Cariño a birbiruenda ita ti nasurok 100,000 nga ubbing iti rehion a saan a nag-enroll idi nagrugi ti pandemya tapno maipaayan dagitoy ti gundaway nga ag-enroll iti agdama nga school year.
Innayonna metlaeng a saan pay a maipatungpal ti face-to-face classes gaputa bassit paylaeng ti bilang dagiti mannursuro iti rehion a nabakunaan kontra iti COVID-19 ken saan paylaeng a nabakunaan dagiti estudyante.
