BAGUIO CITY – Ipalpalagip manen ti City Social Welfare and Development Office (CSWDO)kadagiti addaan plano nga ag-carol iti masakupan ti siudad ti Baguio iti panagalada ti permit.
Sigun kenni CSWDO head Betty Fangasan, iti agdama ket nakaawat daytoy iti 10 nga aplikasyon ti permit para iti panag-carol dagiti maseknan iti nagduduma a babbarangay ditoy siudad.
Kinunana a no iti laeng masakupan ti maysa a barangay ditoy siudad ti pagkantaan dagiti maseknan ket agalada ti permiso iti barangay bayat a dagiti agtarigagay nga ag-carol iti dadduma a probinsia ket nasken nga agalada ti permiso iti DSWD – Cordillera.
Innayonna a kasapulan nga imeten dagiti maseknan ti naipaaay a permit dagitoy tapnu adda iti pammaneknekda a lehitimo ti panag-carolling dagitoy kadagiti rikrikusenda a babbalay.
Ipalpalagipna pay iti publiko ti panagbalinda a naridam kontra kadagiti sumagmamano a mananggundaway nga indibidual a mangisaysayangkat iti kapada nga aktibidad.
