Nagpalagip manen ti Baguio City Health Services Office (CHSO) iti publiko nga agalwad kontra iti dehydration ken heat-related illnesses ita a nabara iti panawen.
Sigun Rommel De Guzman, Health Education and Promotion Officer III iti Baguio City Health Services Office, rumbeng a liklikan ti direkta a pannakaisarang iti init manipod alas-10 iti agsapa agingga iti alas-4 iti malem ken kanayon nga uminom iti umdas a danum.
Inlawlawagna a saan nga umdas ti nasam-it a mainum, softdrinks, ken energy drinks tapno maliklikan ti dehydration.
Nagballaag metlaeng ti City Health Services Office a mabalin a mangitunda iti heat stroke ti heat exhaustion nu saan a dagos a marisut.
Karaman kadagiti sintomas daytoy ti pannakaulaw, panagkapsot, nakaro a panagling-et, ken nalammiis a kudil.
Pinalagipan metlaeng ti opisina ti publiko a siguraduen ti kinadalus ken umno a panagurnong iti taraon tapno maliklikan ti foodborne illnesses ita a nabara ti panawen.
Kabayatanna, napalagipan metlaeng dagiti agturong iti resort ken beach a liklikan ti panaginum iti arak sakbay nga aglangoy ken liklikan iti narugit wenno saan a nasayaat a swimming pool tapno maliklikan ti insidente ken impeksion.
