Idagdagadag dagiti doktor iti publiko nga agannad kadagiti taraon a kankanenda gaputa naparpartak ti pannakadadael dagitoy bayat ti nangato a temperatura iti panawen ti tikag.
Sigun iti presidente ti Philippine Society of Gastroenterology a ni Dr. Ian Homer Cua, nalaka a madadael ti taraon bayat ti kalgaw gapu iti naparpartak a panagadu ti bakteria.
Binalakadanna pay ti publiko a liklikan ti panangpapudot manen iti taraon ken siguraduen a kanayon a presko ti makmakan.
Impaganetget met ti direktor ti East Avenue Medical Center a ni Alfonso Nuñez ti kinapateg ti regular a panagbuggo iti ima tapno malapdan ti panagwaras dagiti sakit a kas iti impeksion ti tian.
Kabayatanna, kinuna met ni Philippine Society of Digestive Endoscopy vice president Dr. Roberto de Guzman Jr. a dagos nga agturong kadagiti doktor nu mapasaran ti panagsakit ti tian a napukuyugan ti gurigor, panagsarwa, ken nu adda ti dara iti ‘rugit.’
Nagpalagip met ti Department of Health (DOH) iti publiko kadagiti sakit a mainaig iti pudot kas iti heat cramps, heat exhaustion, ken heat stroke, nga ad-adda a nasaknap no panawen ti tikag.
