![](https://img.bomboradyo.com/baguio/2021/05/rent-tangay-sangla.jpg)
BAGUIO CITY – Pagan-annaden ti Regional Highway Patrol Unit (RHPU) – Cordillera ti publiko kontra iti agraraira a technical carnapping a baro a modus dagiti sindikato ti carnapping ditoy rehion Cordillera.
Iti eksklusibo a panakiuman ti Bombo Radyo Baguio, kinuna ni PLt.Col. Kimberly Molitas, baro a dadaulo ti RHPU-Cordillera nga ar-aramaten ita dagiti sindikato ti teknolohiya, partikular ti social media tapno allilawen ti publiko.
Kinunana a nagraira dagiti modus a renta-sangla ken renta-tangay iti social media, no sadino, al-allukoyen dagiti carnappers ti kostumer nga agparenta wenno agisalda kadagiti luganda iti nangato wenno nababa unay a presyo ken ditoy metten a gundawayan dagiti suspek a takawan dagiti biktima.
Gapu iti daytoy, imbalakad ni Molitas ti panagridam ti publiko iti panagilako wenno panaggatangda ti lugan babaen iti online.
Inyunay-unayna a kasapulan ti panagberipikar nga umuna kadagiti dokumento ti lugan ken ti panagpatulongda iti RHPU wenno iti Land Transportation Office tapno maamuan no lehitimo dagiti al-alaenda a lugan wenno saan ket gumatangda laengen kadagiti lehitimo nga agilaklako ti lugan.
Sigun pay kenni Molitas, iti kaudian a report ti RHPU-Cordillera ket saan a bumaba iti 10 ti nagbalin a biktima ti carnapping ditoy Cordillera.
Impannakkelna a kalpasan laeng ti tallo nga aldaw manipud nadutukan kas dadaulo ti RHPU-Cordillera ket natiliw dagiti operatiba ti opisinada ti maikatlo ken maikapat a wanted person iti rehion gapu iti kaso a carnapping.