Imbilin ti Department of the Interior and Local Government (DILG) ti mandatory a panagaramat iti body-worn cameras kabayatan ti safety inspections dagiti Bureau of Fire Protection (BFP).
Iti sidong ti DILG policy, masapul a mairekord dagiti fire safety inspections manipud rugi agingga iti panagleppas daytoy.
Malaksid iti dayta, mangrugi ti panagrekord manipud iti fire station, bayat ti panagbiahe, aktual a panangsukimat iti maysa nga establisimiento ken agingga a maiturong ti body camera iti BFP station custodian.
Inyunay-unay ti DILG a dagiti fire safety enforcers ket responsable iti umno a panagaramat kadagiti body-worn camera.
Aniaman a saan a nainkalintegan a pannakapaay a mangirekord wenno panangbalbaliw kadagiti nairekord a footage ket adda ti katukadna a pannusa.
