Agbalbalin a pakaseknan dagiti business establishment iti siudad ti Baguio ti panagaramat dagiti sumagmamano a customers dagitoy kadagiti peke a Persons with Disability Identification card.
Iti pannakiuman ti Bombo Radyo kenni Baguio City Councilor Elmer Datuin, kinunana a daytoy ti maysa kadagiti pakaseknan dagiti business establishments, pakairamanan dagiti transport sectors no sadino adu dagiti grupo a custumer-da nga agar-aramat iti nasao nga ID ngem saan a madlaw no pudno nga addaan dagitoy iti disabilities.
Nupay kasta, inlawlawagna a limmawa itan ti sakop ti panagala iti nasao nga ID no sadino mabalin a makaala ti maysa nga indibidual iti PWD ID uray awanan iti dissibilities iti ruar ti bagina ngem addaan daytoy iti sakit iti uneg kas iti blood pressure, diabetes ken dadduma pay.
Gapu iti dayta, ti laeng ar-aramiden dagiti agtagikua iti business establishments ket ti information campaign no sadino nakapaskil kadagiti pwestoda ti “no to fake ID”.
Kabayatanna, umap-apela daytoy kadagiti agar-aramat iti peke nga identification cards a makonsensya dagitoy kadagiti ar-aramidenda a saan a nasayaat agsipud ta dakkel a lugi daytoy para kadagiti business establishments ken dadduma pay a luklukuenda.
