Inpaulog ni Mayor Roderick Awingan idi kalman ti Executive Order 102 a temporaryo a mangsuspindir iti panagaramat iti dress school uniform kadagiti pagadalan iti munisipyo.
Sigun iti nasao nga ordinansa, maiyaplikar ti nasao a direktiba kadagiti amin a public elementary, secondary ken senior high shools iti Munisipyo. Guyguyugoyenna metlaeng dagiti pribado a pagadalan nga adaptarenda metlaeng ti kapada a polisya kadagiti pagadalanda.
Mabalbalakadan dagiti estudyante nga agkawesda kadagiti long -sleeved shirts, full-length a pantalon, agkawes iti medyas, closed shoes tapno maliklikan ti skin exposure iti mosquito bites.
Impetteng metlaeng ni Mayor Awingan kadagiti pagadalan babaen iti nasao nga ordinansa a saan a mabalin a saan a pastreken dagiti estudyante wenno pag-examen gapu iti saanda a panagsuot iti skirt uniform ita a panagtutudo.
Kagidan iti panangipaulog ni Mayor Awingan iti nasao nga ordinasa ti panangpalagipna kadagiti babbarangay ken pagadalan iti panagisayangkat iti regular clean-up drives pakairamanan ti ‘search and destroy’ operations kontra iti dengue.
Maibasar iti datos ti municipal health, nakairekord ti nasao a munisipyo iti agarup 95 dengue cases manipud Enero agingga Hulyo iti agdama a tawen, mangipakita iti aktibo a presensya ti dengue virus iti munisipyo partikular kadagiti ubbing, estudyante, ken local communities. //bombokaren.c.sapirao
