Itantandudo ti Public Order and Safety Division (POSD) ti pannakaaramat kadagiti eco bags ken plastic containers kas alternatibo kadagiti single-use plastics ken sando bags.
Sigun kenni Public Order and Safety Division Chief Daryll Kim Longid, daytoy ket kagiddan ti pannakaimplementar ti Plastic and Styrofoam free ordinance iti siudad ti Baguio.
Adda dagiti sumagmamano a wagas nga ar-aramiden ti opisinada ket kas iti panangipaayda kadagiti libre nga ecobag ken plastic containers kadagiti market-goers nga awanan iti naitugut a pangikabilan kadagiti gatangenda.
Daytoy ket maysa a bulan nga isaysayangkatdan nu sadino dagiti libre nga ecobag ken container ket masarakan iti opisina ti Public Order and Safety Division.
Mainaig iti daytoy, nadlawda nga epektibo ken naballigi ti pilot testda iti daytoy, ngem panggepda pay a mangikeddeng iti kanayunan a site a pangalaan dagiti market goers kadagiti libre nga ecobag.
Iti agdama, ad-adu dagiti mangal-ala ngem dagiti agdondonate iti eco bags, rason a maal-allukoy dagiti publiko a mabalinda nga agibati kadagiti saanda a maus-usar nga ecobags ken containers iti opisina ti Public Order and Safety Division tapno maaramat daytoy partikular dagiti agkasapulan ken tapno malimitaran ti plastic iti merkado publiko.
