Balbalakdan ti Bureau of Fire Protection-Baguio ti publiko a saanda nga agusar iti paputok tapno maliklikan ti anya man nga insidente ti uram ken disgrasya ita a paskua ken iti mapadpadaanan a baro a tawen.
Malaksid iti dayta, maidagdagadag iti publiko nga agaramatda laeng iti Christmas decorations nga addaan iti ICC sticker.
Iti pannakiuman iti Bombo Radyo kenni Senior Fire Officer 1 Lloyd Ashley Furigay, Public Information Officer iti Bureau of Fire Protection Baguio, kidkidawenda nga agbuya laeng ti dagiti tattao kadagiti fireworks display ket saanda nga agaramat iti anya man a kita iti paputok.
Makidkiddaw metlaeng kadagiti indibidual a mangisayangkat iti fireworks display nga agalada iti permit ngem agturongda pay nga umuna iti Local Government Unit iti siudad ti Baguio sakbayda nga agturong iti opisina ti Bureau of Fire Protection.
Maipaayan dagitoy iti lugar a pangisayangkatanda iti firework display no sadino maipatumpal ti ocular inspection iti lugar a pakaisayangkatan daytoy ken adda metlaeng dagiti fire trucks a nakasagana a mangresponde iti anya man nga insidente iti uram.
Kabayatanna, nakikoordinar ti nasao nga ahensia iti Baguio City Police Office para iti anya man nga iligal a panagilako iti paputok iti siudad.
