BAGUIO CITY – Maikalikagumen kadagiti amin nga drivers ken riders ti motorsiklo, e-bike ken bisikleta a dumaldalyasat iti national highway ken amin nga kalsada iti probinsia ti Benguet ti panagaramat ti High Visibility Vest.
Nailanad daytoy iti Ordinance No. 2022-302 wenno ti High Visibility Vest Ordinance nga inyulog ti probinsial a gobierno nga ag-epektibo intun Mayo 23, 2022.
Sakopen daytoy dagiti amin nga drivers ken riders para iti panagaramatda iti high visibility vest kabayatan ti panagdalyasatda iti amin nga kalsada iti probinsia ti Benguet iti aniaman nga oras.
Amin dagiti drivers ken riders a matiliw nga awanan iti high visibility vest ken material ket mapatawan ti P500 para iti 1st offense; P1,000 iti 2nd offense bayat nga P1,500 ken 3 nga aldaw ti Community Service kadagiti sakopda a barangay iti 3rd offense.
Naiyunay-unay pay iti ordinansa ti panggep ti polisiya a masalwadan dagiti agar-aramat iti kalsada nangruna dagiti drivers ken riders kabayatan ti panagdalsayatda kadagiti kalkalsada iti Benguet.
