BAGUIO CITY – Nakasaganan ti Baguio City nga agawat manen kadagiti turista.
Nupay kasta, kinuna ti City Tourism Office a nasken nga agtungpal latta dagiti turista kadagiti updated guidelines para iti responsable a panagsarungkarda ditoy siudad.
Nailanad iti paka-ammo nga epektibo mangrugi ita nga aldaw dagiti pagalagadan ngem mabalin a mabaliwan no tumaod ti pagkasapulan.
Inyunay-unay ti City Tourism Office a nasken nga agrehistro latta dagiti turista iti visita.baguio.gov.ph tapnu maipaayanda iti QR-Coded Tourist Pass ken nasken a maala daytoy iti uneg ti 24 nga oras sakbay ti panagturong ditoy siudad.
Malimitaran iti 3,000 ti bilang dagiti turista nga innaldaw nga awaten ti Baguio ken nasken nga addan ti reservation dagitoy ditoy siudad.
Apaman a makasangpetda iti border checkpoint ti Baguio ket nasken nga ipakita dagiti turista ti QR-Coded Tourist Pass ken negatibo a COVID-19 test result a naala iti uneg ti 72 nga oras sakbay ti panagsangpetda ditoy siudad.
Nupay kasta, saan met a kapilitan ti negatibo a COVID-19 test result kadagiti turista a 17-anyos nga agpababa.
Nakedngan pay a dagiti laeng turista manipud kadagiti lugar a naipasidong iti General Community Quarantine ken Modified General Community Quarantine ti mapalubusan nga agturong ditoy Baguio.
Maikalikagun metlaeng ti panagtungpal dagitoy kadagiti amin a paglintegan ti Baguio kontra iti COVID-19, pakairamanan ti curfew hours ken liqour ban.
