BAGUIO CITY–Balligi a naisayangkat ti panagbakuna kontra iti covid-19 dagiti health worker iti Baguio General Hospital and Medical Center (BGHMC) idi kalman.
Immunan a kinuna iti Bombo Radyo ni City Administrator Engr. Bonifacio dela Peña a 7,800 a doses ti SINOVAC vaccine ti simmangpet idi rabii ti Huwebes ditoy siyudad ti Baguio a pakairamanan ti 3,600 a doses bakuna a maaramat kadagiti nasurok 1,800 nga health workers iti BGHMC.
Immuna a nabakunaan ditoy ni Dr. Ricardo B. Runez Jr., Medical Chief II-BGHMC a sinaruno da Dr. Ray Suanding, Chief Medical Professional Staff; Atty. Patrick Henry Villanueva, legal officer; Joselito Datud Jr., Chief Nurse; Dr. Thea Pamela Cajulao, Chairperson of Infection Prevention and Control Committee ken Edward Pudlao, Financial Management Officer.
Inlawlawagna a maipangruna dagiti frontliner a mabakunaan kontra iti COVID-19 gapu ta dagitoy ti mangas-asikaso kadagiti pasyente.
Mainaig iti daytoy, imbinglay ti dua nga empleyado ti Baguio General Hospital and Medical Center ti kapadasanda kalpasan a nabakunaan dagitoy iti SINOVAC vaccine sadiay BGHMC Garden.
Sigun kenni Cyrene Romero, maysa a garbage collector iti nadakamat a pagagasan, awan ti nariknana a dakes nga epekto iti bagina ti nasao a bakuna.
Kinunana a naragsakan daytoy iti panakairamanna kadagiti nabakunaan ken tarigagayna nga ado pay nga indibidual ti maguyugoyna nga agpabukana.
Sigun met iti Chief Nurse ti BGHMC a ni Joselito Datug, nagpabakuna daytoy agsipudta kayatna nga agserbi daytoy kas pagtuladan dagiti dadduma nga indibidual.
Inayonna nga awan ti nariknana a sakit idi nabakunaan daytoy.
Kabayatana, balligi nga insayangkat ti Benguet General Hospital (BeGH) ti umuna nga aldaw ti panagbakuna kadagiti nasurok 60 a health workers dagitoy kasaruno ti naipaima nga 500 doses ti Sinovac a bakuna idi kalman.
Kaunaan a nabakunaan ti dadaulo ti BeGH a ni Acting Medical Chief Dr. Meliarazon Dulay ken sinaruno dagiti daduma pay a health workers.
Inatendaran met dagiti opisyales manipud iti nagduduma nga ahensiya ti vaccination roll-out pakairamanan ni DOH Regional Director Ruby Constantino, Assistant Regional Director Dr. Amelita Pangilinan, Gov. Melchor Diclas, DILG Regional Director Araceles San Jose kenni PMAJ. Cleff Vencio.
Agarup 560 ti pakabuklan a bilang dagiti personalidad ti BeGH ngem 500 laeng kadagitoy ti mabakunaan gaputa senior citizen dagiti dadduma ken saan a mairekomendar a maipaay ti nasao a bakuna kadagitoy.
Nupay kasta, manamnama a maipangruna dagitoy a mabakunaan iti kanito a sumangpet ti Astrazenica vaccine iti BeGH.
Manipud iti 13 a municipyo ti Benguet, kaunaan ti Benguet General Hospital a nakaawat ken nangisayangkat iti vaccine roll-out.
Imbinglay met ni Medical Chief Dr. Melia-razon Dulay ti kapadasanna kalpasan a nabakunaan iti SINOVAC vaccine itay agsapa sadiay Benguet General Hospital.
Kinunana nga awan ti nariknana a negatibo nga epekto iti bagina kalpasan a nabakunaan kontra iti COVID-19.
Kagiddan iti dayta, impeksana ti panagyamanna gaputa maysa ti Benguet General Hospital a naipaayan iti bakuna.
Inaklonna a naklaat dagitoy gaputta nasapa a simmangpet dagiti bakuna a naituding koma a sumangpet inton March 12, inton sumaruno a lawas.
Nupay kasta, impettengna a pinagsaganaanda a nalaing isasangpet dagiti bakuna isu’t gapuna a dagos a naisayangkat iti vaccination roll-out.
