BAGUIO CITY – Iyap-apela ti ama ti probinsia ti Benguet ti panangbalin a suki ti publiko kadagiti highland vegetables a mapapataud iti lokalidad.
Kasaruno daytoy ti damag nga agtultuloy latta ti panakaiwaras ken panakailako sadiay Divisoria ken dadduma a merkado iti pagilian dagiti smuggled vegetables a nagtaud sadiay China.
Sigun iti gobernador ti Benguet, nataltalged a kanen dagiti nateng nga agtataud iti lokalidad ken babaen iti panaggatang kadagitoy ket matulongan dagiti mannalon ken dadduma nga stakeholders iti vegetable industry nga apektado met iti agdama a COVID-19 pandemic.
Dinakamatna nga idi immuna a rimwar ti isyu ket dagus a nagsurat ti provincial government ti Benguet iti Bureau of Customs ken Department of Agriculture tapnu iyapela ti panag-aksion dagitoy tapnu maisardengen ti iligal a panakaiserrek iti pagilian dagiti nateng manipud China.
Inaklonna met nga apektado ti vegetable industry ti Benguet ken rehion Cordillera nangruna dagiti mannalon kagiddan ti panagraira dagiti smuggled vegetables.
Maipalagip a ti Benguet ti kadakkelan nga agpapataud ti highland vegetables a katukad ti agarup 80 percent iti suplay ti pagilian.
