BAGUIO CITY – Inaklon ni sigud a PNP-CIDG chief ken ita ket Baguio City Mayor Benjamin Magalong a dakkel a disturbo iti trabahona ditoy siudad ti Baguio ti panagtestigona kadagiti hearing ti Senado seknan kadagiti ninja cops.
Iti eksklusibo nga interview ti Bombo Radyo Baguio kenni Mayor Magalong, kinunana a daytoy ket gaputa adu ita dagiti programa ken proyekto iti siudad a pappapartaken dagitoy.
Kinunana a dakkel a karit kenkuana no kasanona nga ibalanse ti trabahona ditoy siudad ken ti panagbalinna a resource person kadagiti panagdengngeg iti Senado.
Nupay kasta, kinunana a makitkitana dagiti benepisyo ti ar-aramidenna ita iti Senado isut gapuna nga awan ti pagbabbabawianna kadagiti imbutaktakna seknan iti aramid dagiti ninja cops.
Innayonna nga adu a milyon nga agtutubo ti maispal iti maisaysayangkat nga anti-drug campaign ti gobyerno no talaga a pudno a nadalus ti organisasyon ti pulisya a maysa kadagiti mangisaysayangkat iti nasao a kampanya.
Kabayatanna, impasigurado ni Mayor Magalong kadagiti taga-Baguio nga awan ti rumbeng a pagdanagan dagitoy iti panakaimaton ti lokal a gobyerno gaputa adda ti impaaynan a guidance para kadagiti linawas a puntirya ti siudad.
Sigun kenkuana, adda dagiti dinutukanna a champion teams a mangipasgurado iti panakaragpat dagiti puntirya ken kasapulan laeng ti panagmonitorna.
Innayonna pay nga adda ti City Administrator a mangipasigurado nga uray awan daytoy iti siudad ket agtatrabaho dagiti departamento ti City Hall. (with Bombo Jordan Tablac)
