Maysa a relief ken very satisfying a laban para kenni Joshua “The Passion” Pacio ti panagballigina kontra kenni Jarred “The Monkey God” Brooks iti trilogy match dagitoy iti ONE Strawweight MMA World Title idi February 20 idiay Lusail Sports Arena, Qatar.
Iti panakiuman iti Bombo Radyo kenni ONE Strawweight MMA World Champion Joshua Pacio, imbinglayna a very satisfying ti panangabakna nangruna ta adu dagiti nagdalanan daytoy sakbay ti ONE 171:Qatar kas iti panagpatamingna iti nasagrapna a knee injury, partikular ti ACL tear.
Sigun kenni Pacio, apaman a naideklara a cleared daytoy iti nasao a dunor ket napanggep ti trilogy matchda kenni Brooks.
Inaklon ti Cordilleran Mixed Martial Arts Fighter a saan a nakasagana ti mentalidad daytoy para iti nasao a laban gapu ta sumagmamano a bulan a saan a nakapag-ensayo gapu iti panagpatamingna, kasta met a dimmagdsen ti timbangna.
Nupay kasta, intuloy latta ti Cordilleran fighter a sangwen ti long-time rival daytoy a ni Brooks babaen iti panakitinnulong iti training camp dagiti kakadwanana.
Mainaig iti dayta, dinakamat ni Pacio a situational ti panagsanayna nu sadino, nangaramidda iti code names dagiti techniques tapno saan a maawatan ti kalabanna a ni Brooks nga agdengdenggeg metlaeng.
Kabayatana, pinagyamanan ni Pacio dagiti amin a simmuporta kenkuana kas kadagiti dakkel a porciento dagiti Pilipino a nagbuya idiay Qatar kasta metten dagiti nagbalin a katulunganna iti training, dagiti nangipaay iti ksapulanna, ken daduma pay a nagsubaybay iti labanna.
Iti agdama, awan pay ti nakalinya a laban daytoy ngem dinakamatna a posible nga agsangoda manen kenni Brooks nu maaddaan iti gundaway nangruna ket ubbing pay dagitoy, kasta met a posible a makalabanna ni Russian fighter Mansur Malachiev.//Bombo Rob Dominguez
