BAGUIO CITY – Tungpalen ti Philippine Drug Enforcement Agency (PDEA) – Cordillera ti puntirya ti gobyerno a panakadalus ti pagilian manipud iti iligal a droga.
Sigun kenni PDEA-Cordillera regional director Gil Castro, aramidenda ti amin tapnu agballigi ti drug war sakbay nga agleppas ti termino ni Presidente Rodrigo Duterte.
Kinunana a kissayanda dagiti dadakkel a personalidad nga addaan koneksion iti illegal drug trade ditoy Cordillera Region tapnu maipakita iti publiko ti panagballigi ti kampanya kontra iti iligal a droga.
Pinagyamannanna met ti panakaipatungpal dagiti border restrictions a paset ti panagannad kontra iti COVID-19 gaputa maipapaayan iti gundaway dagiti operatibada a mangtiliw kadagiti drug personalities iti lokalidad.
Nupay kasta, inaklon ni Director Castro a dakkel latta a karit kadakuada ti panangdalus iti rehion manipud iti iligal a droga ngem mamatida a babaen kadagiti agtultuloy a kampanya kontra iti iligal a droga ket agbalinen a drug cleared ti rehiyon Cordillera.
Kabayatanna, dumanon laengen iti 79 a barangay iti Cordillera Region ti apektado iti iligal a droga.
Malaksid iti daytoy, kinuna ni Castro a nainget ti panangbantayda kadagiti 58 a watch-listed personalities, 65 a target-listed personalities ken dua a grupo nga addaan operasyon ditoy Cordillera.
Imbinglayna metlaeng nga inton December 4 sadiay Bacnotan, La Union ket uramen ti opisinada ti nasurok 500 a kilo ti marijuana ken nasurok 100 a kilo ti shabu a nakumkumpiskar dagitoy kadagiti insaysayangkatda nga operation iti rehion.
Immunan nga inuramda ti nasurok P20-M a gatad ti marijuana idi napalabas a bulan.
