BAGUIO CITY – Agtultuloy ti panagbantay dagiti otoridad kadagiti tourist spots sadiay Mankayan, Benguet kagiddan ti nabara nga isyu mainaig kadagiti new people’s army wenno NPA.
Sigun kenni Mankayan Mayor Materno Luspian, iti agdama ket naingetan ti panagbantay dagiti kameng ti kapulisan kadagiti kangrunaan a tourist destinations sadiay kas iti Am-am Viewdeck.
Kinunana a malaksid kadagiti pulis ket adda metlaeng dagiti Citizen Armed Force Geographical Unit nga agpatpatrolya sadiay ken adda pay dagiti nakamuntar a police compac iti nasao a munisipyo ken kadagiti kabangibang a munisipyo.
Innayuna nga iningetan metlaeng dagiti pulis ti panagpatrolyada iti rabii tapnu maipanamnama ti linak ken kapia sadiay ken tapnu mamonitorda nu adda dagiti indibidual a mapagduaduaan ti garawna.
Binalakadanna met dagiti turista nga agturturong sadiay a nasken nga adda ti kadwada a tour guides wenno residente sadiay iti panagpasyarda nangruna nu saanda nga ammu dagiti dalan iti pagturunganda ken agparehistroda pay iti municipal tourism office.
