Nagballaag ni Dr. Frederick Serrano manipud iti Northern Exotic and Wildfire Troopers kadagiti amin a fur parents wenno kadagiti amin nga adda ti alagana a bantayanda dagitoy nangruna ita a nabara ti panawen.
Iti panakiuman ti Bombo Radyo kenni Dr. Serrano, imbinglayna dagiti tips a nasken a maiyaplikar ita a Summer vacation.
Daytoy ket kas iti panangpasigurado a kanayun nga adda iti danum iti uneg wenno ruar ti pagtaengan nga ayan ti nasao nga ayup.
Nasken met ti panangipastrek kadagiti alaga nu orasen ti alas dies ti agsapa kasta pay ti saan a panangipagna kadagiti alaga no nabara ti panawen.
Insuhestiyon ni Dr. Serrano a para kadagiti maipagpagna nga ayup ket mabalin nga aramiden daytoy iti parbangon wenno iti rabii.
Innayonna pay a mabalin a kargaan iti alchol ti baba ti saka dagiti ayop kasta met a punasan dagitoy no nagling-etda.
Kabayatanna, iti laksid a nabara ti panawen, maisingsingasing a ti panagpadigos kadagiti alaga a kas iti pusa ken aso ken mamingsan iti maysa a lawas tapno maliklikan ti panakairiyta dagitoy.
Nagpalagip met daytoy kadagiti amin a fur parents a nasken ti panangkita kadagiti alaga no sadino rumbeng a maiturong dagitoy kadagiti veterinary clinics no adda iti sabali a mapaspasamak kadagiti ayup.
