Agtultuloy latta ti panagbantay ken panagmonitor dagiti otoridad iti nakapasamakan ti uram idiay Puguis, La Trinidad, Benguet idi laeng kalman agingga a saan pay daytoy a nasayaat a nadalusan.
Iti interview ti Bombo Radyo kenni Fire Senior Inspector Jeric Ramolete, Fire Marshall iti Bureau of Fire Protection-La Trinidad, Benguet, kinunana a kasapulan a bantayan daytoy agsipud ta adda latta ti posibilidadna nga agrekindle.
Gapu iti dayta, temporaryo paylaeng nga agnanaed dagiti residente a naapektaran iti nasao nga uram iti rural health unit iti nasao a munisipyo.
Sigun kenni Ramolete kasapulan paylaeng ti naan-anay a panagdalus dagitoy sakbay nga agsubli dagiti naapektaran a residente iti pagtaenganda agsipud ta delikado daytoy ken makadadael metlaeng daytoy iti salun-at agsipud ta 40,000 a litro ti petrolyo ti naibelleng iti nasao a lugar.
Dagus metlaeng a nakikoordinar dagitoy iti agtagikua iti gas tanker para iti pannakadalus ken pannakitinnulong dagitoy iti nasao nga aksidente.
Maipalagip a nagresulta ti nasao nga uram iti pannakauram dagiti walo nga establishments, resedential, warehouse pakairamanan dagiti sangapulo ket maysa a lugan ken maysa a motorsiklo.
Kabayatanna, nagpalagip daytoy kadagiti umili iti nasao a munisipyo a kanayon nga agbalin nga alerto ken naridam kadagiti aglawlawda agsipud ta iti aniaman nga oras ket awan ti pilpilien ti aksidente partikular ti uram.
