BAGUIO CITY – Ipalpalagip manen ti Department of the Interior and Local Government (DILG) – Cordillera ti Memorandum Circular 2021-119 a nakailanadan ti ballaag mainaig iti panagsingir ti rebelde a grupo iti babayadan para iti Permit-to-Campaign ken Permit-to-Win.
Sigun kenni DILG-Cordillera Regional Director Araceli San Jose, kayatda a ballaagan dagiti tumaray iti eleksion inton 2022 manipud iti nasao nga aramid ti rebelde a grupo ken kapada nga organisasyon tunggal dumanon ti panawen ti eleksion.
Kinunana a nasken a saan nga agited dagiti agkandidato iti pondo wenno uray aniaman a materyales iti rebelde a grupo tapnu saan nga agballigi ti insurhensia dagitoy ditoy rehion.
Inyunay-unayna a no saan a maipaay dagiti kayat ti rebelde a grupo ket agtultuloy met ti panagballigi ti kampanya ti gobyerno kontra iti insurhensia nga agresulta iti napapaut a kapia ken nasustinir a panagdur-as.
