BAGUIO CITY – Nangputar ti lokal a konseho ti Baguio iti maysa nga addang tapnu maksayan ti parikut iti trapiko ditoy siudad nangruna kadagiti holidays.
Sigun kenni Councilor Edgar Avila, kasapulan a masingir dagiti sangaili nga agitugot iti luganda ditoy siudad wenno ti panagbayad dagitoy iti congestion fee ken ecology fee kabayatan ti kaaddada ditoy Baguio.
Nailanad iti singasingna a kabayatan ti holidays ket maipataw ti P200-P400 a congestion fee ken partikular a masingir ti P200 kadagiti kotse, jeep, van, delivery van ken truck bayat a P400 kadagiti tourist buses iti tunggal aldaw.
Isaksaksadna pay ti panagbayad dagiti amin a turista, lokal man wenno gangannaet iti P50 a tourist ecology fee.
Impannakkel ni Avila a babaen iti nasao nga addang ket adda ti alternatibo a solusyon tapnu maupay dagiti turista a mangitugot iti luganda no umayda ditoy siudad a makatulong iti panakakissay ti nailet a trapiko.
