BAGUIO CITY – Imbilin ni City Treasurer Alex Cabarrubias ti panagbayad dagiti umili ken dagiti negosyante ditoy siudad ti Baguio iti residential garbage fee dagitoy iti bukodda a barangay ita a tawen.
Kinunana a nagpapatangdan kadagiti barangay officials ken napagnumuan a dagitoy ti tinawen nga agkolektar iti residential garbage fee dagiti adda iti masakupanda tapno adda met ti bingay ti barangay manipud iti nasao a babayadan.
Dinakamatna a 30 percent ti bingay ti barangay iti garbage fee bayat a 70 percent iti city government.
Innayonna nga ad-adalen ita ti lokal a konseho ti panagbalin a 50-50 ti bingay iti garbage fee tapno matulungan dagiti barangay iti panangimaton iti basura dagitoy.
Sagudayen ti Tax Ordinance No. 001 series of 2001 ti siudad ti Baguio a tunggal balay ket nasken nga agbayad iti binulan a P20 kas residential garbage fee ken dagiti nasao a babayadan ket maaramat iti city environment and sanitary services, partikular iti panag-akop kadagiti basura ken iti tipping fee.
Naamuan nga idi 2016, nakakolektar ti City Treasury Office iti agarup nasurok P27-M a garbage fees ken agarup nasurok P15-M a sewerage fees.
