BAGUIO CITY – Manamnama nga iti kabiitan a panawen ket mangrugi metten ti panagbiahe dagiti modernized jeep sadiay probinsia ti Ifugao.
Kasaruno daytoy ti panangiyusuat ti Ifugao Transport Service Cooperative iti 10 nga yunit ti modernized jeeps nga agbiahe iti ruta nga Ifugao-Nueva Vizcaya.
Nupay kasta, inaklon ni Johnny Dulawan, chairman ti Board of Directors ti nasao a kooperatiba nga awan pay ti operasyonda gaputa adda pay ti nasken nga alaenda a dokumento kas iti mayor’s permit manipud iti Banaue, Lagawe ken Solano.
Dinakamatna met a kas maitunos iti pagalagadan ti PUV Modernization Program ti gobyerno, amin a traditional jeep ket sukatan dagiti modernized jeep gaputa naituding nga agpaso inton March 31, 2022 ti provisional authority a naipaay kadagiti traditional jeeps.
Linawlawaganna met a no saan a kabaelan dagiti modernized jeeps a mangakomodar kadagiti agbalin a pasahero ket mabalin nga agbiahe dagiti traditional jeeps agingga a makompleto ti maikalkalikagum a bilang ti yunits a nasken nga agbiahe iti Ifugao-Nueva Vizcaya.
