BAGUIO CITY – Pinunas ti city administrator ti posible a panagbuteng dagiti umili ti Baguio City iti pangta ti subvariant ti Omicron a naawagan ti BA.2.12.
Iti panakiuman ti Bombo Radyo Baguio, kinuna ni City Administrator Engr. Bonifacio Dela Pena a ti panagngato ti kaso ti COVID-19 itay kallabes ket awan ti pakainaiganna iti nasao a subvariant.
Maipalagip nga idi laeng kalman ket naipadamag a nailista ti Baguio City ti kaunaan a kaso ti BA.2.12.
Babaen daytoy iti maysa a foreign traveler, agtawen iti 53, babai, nagtaud manipud Finland ken addaan ti commorbidity partikular ti hypertension.
Simmangpet iti pagilian idi Abril 2 ken nagturong iti siudad idi Abril 7. Nakarikna ti sintomas idi Abril 10 ken positibo ti resulta ti COVID-19 testing daytoy idi Abril 11.
Naadmitar iti ospital idi Abril 12 ken naamoan nga addaan daytoy ti Hypertension Stage II COVID infection.
Nupay kasta, nakaruar iti ospital idi Abril 18 ken nagsubli metten sadiay idi Abril 20.
Kinumpirmar met ti Philippine Genome Center idi Abril 23 nga addaan daytoy ti Omicron BA.2.12, maysa a subvariant a mangituntunda iti panagngato ti kaso ti COVID-19 sadiay US ken South Korea.
Sigun kadagiti eksperto, 20% a naparpartak nga agalis ti nasao a variant nu idilig iti BA.2.
Iti baet daytoy, impetteng ni Dela Pena a saan a nasken nga agdanag ti publiko gaputa naimbaganen ti nasao a pasiente manipud iti nasao a sakit.
Impaganetgetna nga amin a nakapulapol ti nasao a pasiente ket nabigbigen ken naipasidong metten iti covid-19 testing.
