Ka-Bombo, adventurous kayu kadi? Kayat yu met kadi nga ipadas ti ag-cross over kadagiti nagduduma a pagilian kas iti Israel, Estados Unidos ken daduma pay.
Imatangan ken padasen dagiti nagduduma a scenery, kultura ken trabaho iti ballasiw taaw.
“Kung feeling niyong mag-explore, try niyo mag-abroad, walang masasayang” ti mensahe ni Jay Guimbo, Hog farmer idiay Iowa, USA kadagiti indibidual a mangpangpanggep a padasen ti kabibiag iti sabali a pagilian.
Iti panakiuman ti Bombo Radyo kenni Guimbo, imbinglayna a sakbay a nagbalin daytoy kas hog farmer idiay Iowa ket sigud a government employee daytoy iti Department of Agriculture (DA) ken Collgege teacher iti pagilian a Pilipinas.
Kalpasanna dayta ket impadasna ti agtrabaho kas maysa a mannalon iti pagilian nga Israel iti las-od ti maysa a tawen.
Sigun kenni Guimbo, pratical ti rason para iti panagturongna iti sabali a pagilian, daytoy ket para iti mas “competitive” a sueldo.
Nu pay kasta, iti panagturongna idiay Iowa, USA, nagbalin a karit kenkuana ti USA Embassy interview, ti maudi a proseso para iti panakaabrobar wenno saan ti visa daytoy.
Kinuna ni Guimbo nga ado nga indibidual ti saan a nagballigi nga agturong idiay Estados Unidos gapu iti saanda a panangipasa iti USA Embassy interview.
Iti panagbalin ni Guimbo kas hog farmer, kinunana nga iti farrowing site ti pagtratrabahoanna, ti maipapan ti panagpaanak kadagiti baboy.
Dumanon met iti agarup 12,000 a baboy ti banbantayanna manipud iti pakabuklan nga agarup 60,000 a baboy nga al-allagaan ti kompanya dagitoy.
Sigun kenni Guimbo, dagiti baboy nga al-allagaanda ket para iti exportation iti pagilian a Brazil.
Kabayatanna, imbinlay ni Guimbo nga agmaymaysa daytoy a Pilipino iti kompanya a pagtratrabahoanna nangruna ket manmanu laeng a Pilipino ti adda idiay Iowa saan a kas idiay New Yorck City.
Dagiti katrabahoan daytoy ket kangrunaan a Mexicans, Mongolians ken dagiti manipud Czech Republic rason nga agbalbalin a karit nu kasano ti komunikasyon dagitoy agsipud ta basic nga English ti ammo dagiti katrabahoanna.
Nakuna pay ni Guimbo nga idiay Iowa ket saanda a kayat ti panagbow bayat ti panag-excuse kasta met a nu agungetda ket diretsahan.
Iti panagbalin kas Overseas Filipino Worker, kinuna ni Guimbo a nasken ti panagbalin a natibker ken ti saan a panagbalin a maarte nangruna ket saan a mausar nu mamingsan ti Bachelor’s Degree a naiturpos iti sabali a pagilian.
Manamnama met nga agleppas ti maysa a kontrata ni Guimbo idiay Iowa nu sadino balakna nga agcross-over idiay Canada.//Bombo Mera Pacpacan
